“Oʻzkimyosanoat” AJ Seul shahrida boʻlib oʻtgan muhim minerallar boʻyicha Oʻzbekiston-Janubiy Koreya biznes-forumida ishtirok etdi

Mamlakatimiz elchixonasi koʻmagida Oʻzbekiston togʻ-kon sanoati va geologiya vazirligi, Investitsiyalar, sanoat va savdo vazirligi, “Oʻzbekiston texnologik metallar zavodi” AJ, “Oʻzkimyosanoat” AJ va Qoraqalpogʻiston Vazirlar Kengashi vakillaridan iborat delegatsiyaning Janubiy Koreyaga tashrifi tashkil etildi, deb xabar qildi “Dunyo” AA muxbiri.

Tashrif doirasida mamlakatimiz delegatsiyasi Koreya Respublikasi Savdo, sanoat va energetika vazirligi bilan hamkorlikda tashkil etilgan muhim foydali qazilmalar boʻyicha Oʻzbekiston – Janubiy Koreya biznes-forumida ishtirok etdi.

Unda “LG Ensol”, “Samsung SDI”, “SK On”, “Posco”, “TaeguTech”, "KHNP", “KOMIR”, “LX International”, “KCC Corporation”, “EcoBio” singari yigirmadan ortiq yirik kompaniyalar hamda Koreya sanoat texnologiyalari instituti (KITECH), Koreya geologiya va mineral resurslar instituti (KIGAM) va boshqalar qatnashdi.

Oʻzbekiston vakillari oʻz maʼruzalarida ikki tomonlama hamkorlikning bugungi holati, shuningdek, geologiya, metallurgiya va kimyo sanoati sohalaridagi aniq loyihalar haqida soʻzlab berishdi. “O‘zkimyosanoat” AJ vakillari ishlab chiqaruvchilar va kimyoviy mahsulotlar yetkazib beruvchilar qo‘llaniladigan imtiyoz va preferensiyalar haqida atroflicha ma’lumot berishdi.

Mamlakatimiz diplomatik vakolatxonasi maʼlumotiga koʻra, Koreya Respublikasi Savdo, sanoat va energetika vaziri oʻrinbosari Li Xoxyon bilan muloqotda Oʻzbekiston – Koreya Respublikasi nodir metallar ilmiy-texnologik markazi ilmiy ishlanmalarini tijoratlashtirish boʻyicha hamkorlikdagi ishlarni faollashtirishga alohida eʼtibor qaratildi. 

Janubiy Koreya kompaniyalari bilan oʻtkazilgan ikki tomonlama muzokaralarda Oʻzbekistonda yangi investitsiyaviy loyihalarni amalga oshirish istiqbollari atroflicha muhokama qilindi.  Xususan, “NEW&NEW” kompaniyasi bilan birgalikda kosmetika mahsulotlari ishlab chiqarish, “Kumho P&B Chemicals” va "Lotte Chemical" kompaniyalari bilan bilan kimyo mahsulotlari, “KCC Corporation” bilan qurilish materiallari ishlab chiqarish, “EcoBio” bilan chiqindilarni qayta ishlash majmuasini qurish, shuningdek, “Shindong Resources” bilan “Sautbay” volfram konini oʻzlashtirish imkoniyatlari xususida fikr almashildi.

Janubiy Koreyaning Kimyoviy menejment assotsiatsiyasi bilan mamlakatimiz sanoat salohiyati bilan tanishish uchun yirik kimyo kompaniyalari vakillarining Oʻzbekistonga safarini tashkil etish masalasi muhokama qilindi.

Tashrif yakunlari boʻyicha yangi loyiha va tashabbuslarni amalga oshirish mexanizmlari boʻyicha "yoʻl xaritasi" imzolandi.

"O'zkimyosanoat" AJ Matbuot xizmati