Mutaxassislar tomonidan fishing hujumlari, soxta havolalar, zararli fayllar va turli firibgarlik sxemalari haqida maʼlumot berildi.

Xodimlarga shubhali havolalarni ochmaslik, notanish fayllarni yuklamaslik, parol va akkauntlarni ishonchli himoya qilish, ikki bosqichli autentifikatsiyadan foydalanish, bank kartasi maʼlumotlari va SMS-kodlarni begona shaxslarga bermaslik tavsiya etildi.

Shuningdek, kiberhujum yoki shubhali holatga duch kelinganda toʻgʻri harakat qilish boʻyicha amaliy tavsiyalar berildi.

Taʼkidlanganidek, kiberxavfsizlikni taʼminlashda har bir xodimning raqamli savodxonligi va kibergigiyena qoidalariga amal qilishi muhim ahamiyatga ega.

“Oʻzkimyosanoat” AJ rahbariyatining hududlarda biznes vakillari bilan toʻgʻridan-toʻgʻri muloqotlari davom etmoqda.

Ushbu uchrashuvlar Oʻzbekiston Respublikasi Prezidentining tadbirkorlar bilan oʻtkaziladigan VI ochiq muloqotiga tayyorgarlik doirasida tashkil etilmoqda. Asosiy maqsad — tadbirkorlarni qiynayotgan muammolarni aniqlash, taklif va tashabbuslarni eshitish hamda ularga amaliy yechimlar ishlab chiqish.

Navbatdagi uchrashuv Surxondaryo viloyatida kimyo sanoati sohasida faoliyat yuritayotgan tadbirkorlik subyektlari va korxona rahbarlari ishtirokida oʻtkazildi.

Muloqotda kimyo mahsulotlari ishlab chiqarish, xomashyodan samarali foydalanish, chiqindilarni boshqarish va qayta ishlash, ishlab chiqarish hajmlarini kengaytirish hamda yangi loyihalarni amalga oshirish masalalari muhokama qilindi.

Xususan, Termiz shahridagi “BIO TEXNO ECO” MCHJ polietilen va armoplast naylar, ikki qatlamli gofrirlangan quvurlar ishlab chiqaradi. Sherobod tumani Chorbogʻ mahallasidagi “XUJAIKON TUZ” MCHJ tuz qazib olish bilan shugʻullanadi. Denov shahridagi “ABULFAYZ-MIRAKBAR” oilaviy korxonasi esa chiqindilarni boshqarish va toʻplash yoʻnalishida faoliyat yuritadi.

Uchrashuvda tadbirkorlarning taklif va murojaatlari eshitilib, ularni hal etish boʻyicha tegishli choralar belgilab olindi.

Bunday ochiq muloqotlar hududlardagi dolzarb masalalarni bevosita tadbirkorlar ishtirokida oʻrganish va soha rivoji uchun amaliy yechimlar ishlab chiqishga xizmat qilmoqda.

2025-yilda Yevropada kompozit materiallar bozori hajmi 28,1 mlrd dollarni tashkil etdi. Precedence Research (PR) hisobotiga koʻra, 2026–2035-yillar davomida bozor hajmi 29,6 mlrd dollardan 47,5 mlrd dollargacha oʻsib, oʻrtacha yillik oʻsish surʼati 5,38 foizni tashkil etadi.

Armirlovchi element turi boʻyicha shisha tolali kompozitlar ustunlik qiladi — ularning bozordagi ulushi 64,8 foizni tashkil etadi. Undan keyin 22,7 foiz ulush bilan uglerod tolali kompozitlar turadi.

Yakuniy foydalanish sohalari kesimida avtomobil sanoati 26,1 foiz ulush bilan yetakchilik qiladi. Keyingi oʻrinlarda qurilish sohasi — 16,6 foiz, shamol energetikasi — 15,4 foiz, shuningdek, aerokosmik va mudofaa sanoati — 12,7 foiz ulush bilan qayd etilgan.

Yevropa Ittifoqi kompozit materiallar bozoridagi asosiy kompaniyalar qatoriga PPG Industries, Toray Industries, Owens Corning, Hexcel Corporation va DuPont kiradi.

Tadbir ishtirokchilari birgalikda 5 000 qadam yurib, sog‘lom hayot tarzi, jismoniy faollik va faol hayot pozitsiyasini qo‘llab-quvvatladilar.

Ayniqsa, yurtimiz mustaqilligining 35 yilligini munosib kutib olish arafasida o‘tkazilgan ushbu tashabbus xodimlarni bir maqsad atrofida birlashtirib, ko‘tarinki kayfiyat bag‘ishladi.
 

“Oʻzkimyosanoat” AJ Korrupsiyaga qarshi kurashish boshqarmasi tashabbusi bilan tarmoq korxonalarida korrupsiyaning oldini olish va unga qarshi kurashish samaradorligini yanada oshirishga qaratilgan tadbir tashkil etildi.

Unda “Maxam-Chirchiq”, “Ammofos-Maxam” va “Navoiyazot” AJlar boshqaruv raislari, ularning oʻrinbosarlari hamda korrupsiyaga qarshi kurashish boʻlinmalari xodimlari ishtirok etdi.

Tadbirda Prezidentimizning 2025-yil 30-dekabrda qabul qilingan “Oʻzbekiston Respublikasida korrupsiyaning oldini olish va unga qarshi kurashish tizimini yanada takomillashtirish toʻgʻrisida”gi farmoni hamda 2026-yil 22-iyunda qabul qilingan “Oʻzbekiston Respublikasining ayrim qonun hujjatlariga korrupsiyaga qarshi kurashish samaradorligini oshirishga, korrupsiyaga oid jinoyatlar uchun javobgarlik muqarrarligini taʼminlashga qaratilgan qoʻshimcha va oʻzgartirishlar kiritish toʻgʻrisida”gi qonuni mazmun-mohiyati atroflicha muhokama qilindi.

Xususan, mazkur hujjatlarda korrupsiyaga qarshi ichki tuzilmalar faoliyati samaradorligini oshirish, ularning mustaqilligini taʼminlash va vakolatlarini kengaytirish, korrupsiyaviy xavf-xatarlarni barvaqt aniqlash hamda ularning oldini olish boʻyicha belgilangan vazifalarga alohida eʼtibor qaratildi.

Shuningdek, davlat xaridlarini amalga oshirish jarayonida mablagʻlarni asosli va maqsadli sarflash, korrupsiyaviy xavflarni minimallashtirish, manfaatlar toʻqnashuviga yoʻl qoʻymaslik hamda belgilangan qonunchilik talablariga qatʼiy rioya etish masalalari boʻyicha ishtirokchilarga tegishli tushuntirishlar berildi.

Tadbir yakunida tarmoq korxonalarida korrupsiyaga qarshi komplayens tizimini yanada takomillashtirish, korrupsiyaviy holatlarning oldini olish va bu borada xodimlarning huquqiy xabardorligini oshirishga qaratilgan chora-tadbirlarni izchil davom ettirish zarurligi taʼkidlandi.
 

Korxonaga qarashli sanatoriy-profilaktoriydagi bunyodkorlik ishlari yakunlanish arafasida. Bu yerda xodimlarning salomatligini tiklash, ularning munosib sharoitda dam olishi, reabilitatsiya jarayonlarini samarali tashkil etish maqsadida barcha imkoniyatlar yaratilmoqda. Shinam xonalar, tibbiy muolajalar, mazmunli hordiq chiqarish uchun qulay sharoit, sport inshootlari, obod, ko‘kalamzorlashtirilgan maskan mehnat unumdorligini oshirishda muhim o‘rin tutadi.

Majmuaning foydalanishga topshirilishi xodimlarni ijtimoiy qo‘llab-quvvatlash, ularning salomatligi muhofazasi va hayoti sifatiga ijobiy ta’sir etadi. Ushbu loyiha korxonada inson qadrini ulug‘lash, xodimlar farovonligini ta’minlash hamda mehnat jamoasi uchun munosib ijtimoiy infratuzilmani shakllantirishga qaratilgan ezgu ishlarning uzviy davomidir. Zamonaviy sanatoriy-profilaktoriy minglab mutaxassislar, mehnat faxriylari, fuqarolarning jismoniy, ruhiy holati muvozanatini ta'minlashga munosib hissa qo‘shadi.

Mazkur maskan O‘zbekiston Respublikasi davlat mustaqilligining 35 yilligi munosabati bilan foydalanishga topshiriladi. Bu esa ushbu qutlug‘ sanaga munosib tuhfa bo‘lib, korxonada amalga oshirilayotgan keng ko‘lamli ijtimoiy islohotlar va bunyodkorlik ishlarining amaliy ifodasiga aylanadi.

Avval xabar berganimizdek, Oʻzbekiston Respublikasi davlat mustaqilligining 35 yilligi munosabati bilan mamlakatimizda amalga oshirilayotgan “Mahallada obodlik va mehr-saxovat oyligi” doirasidagi “Dolzarb 40 kun” tadbirlari hamda “Kambagʻallikdan – farovonlik sari” dasturi asosida Dehqonobod tumanining “Bozortepa“ va “Obod“ mahallalarida obodonlashtirish ishlari olib borilmoqda.

Obodonlashtirish bilan bir qatorda hududlarning ijtimoiy-iqtisodiy holatini yaxshilashga qaratilgan chora-tadbirlar ham amalga oshirilmoqda. Xususan, “Oʻzkimyosanoat” AJ masʼullari tomonidan aholi tomorqalari va ijara yer maydonlaridan foydalanish holati oʻrganilib, sugʻorish tizimlarini takomillashtirish, elektr taʼminotini yaxshilash hamda amalga oshirilgan loyihalar samaradorligi tahlil qilinmoqda.

Bu kabi yumushlar mahallalarning obod qiyofasini yanada yaxshilash, aholi uchun qulay muhit yaratishga xizmat qilmoqda. Amalga oshirilayotgan ishlar mahallalarning obod qiyofasini yanada koʻrkamlashtirib, aholi uchun qulay yashash muhitini shakllantirmoqda.

Bu ezgu tashabbuslar Davlat mustaqilligining 35 yilligini munosib tarzda nishonlashga tadorikdir.
 

Zuhra Jahongirova korxonaning 57-sexida muhandis-konstruktor sifatida mehnat qiladi. U o‘z faoliyati davomida ishlab chiqarish jarayonlarini takomillashtirish, texnik yechimlarni ishlab chiqish va loyihalash ishlarida faol ishtirok etib kelmoqda. Mas’uliyat, aniqlik va kasbiga bo‘lgan sadoqati bilan jamoada alohida hurmat qozongan mutaxassis mustaqillik bilan tengdosh avlod vakili sifatida yurtimiz sanoati rivojiga munosib hissa qo‘shmoqda.

Mutaxassislikni tanlaganimdan hech qachon afsuslanmaganman. Korxonada orttirgan tajribam, ustozlarimning maslahati va jamoaning qo‘llab-quvvatlashi mening eng katta boyligim. Bugungi taraqqiyot va yaratilayotgan imkoniyatlar yanada mas’uliyat bilan mehnat qilishga undaydi. Yurtimiz mustaqilligi abadiy bo‘lsin, aziz Vatanimiz yanada taraqqiy etsin, — deydi Zuhra Jahongirova.

 

Oʻzbekiston Respublikasi Prezidentining tadbirkorlar bilan oʻtkaziladigan ochiq muloqoti arafasida “Oʻzkimyosanoat” AJ masʼullari tomonidan hududlarda biznes vakillari bilan bevosita uchrashuvlar davom etmoqda.

Navbatdagi uchrashuv Surxondaryo viloyatida tashkil etilib, unda kimyo sanoati sohasida faoliyat yuritayotgan korxonalar faoliyati oʻrganildi hamda tadbirkorlarning taklif va muammolari tinglandi.

Tashrif doirasida Muzrabot tumanida joylashgan “Surxon KSP-Grand” MCHJning qamish qirindisidan KSP (qurilish uchun yogʻoch-strujkali plita) mahsulotlari ishlab chiqarishga ixtisoslashgan, yillik 150 ming kub metr quvvatga ega ishlab chiqarish majmuasi faoliyati bilan tanishildi.

Oʻrganishlar davomida korxona tomonidan Termiz tumanida yillik 30 ming kub metr hamda Muzrabot tumanida yillik 150 ming kub metr quvvatli KSP qurilish mahsulotlari ishlab chiqarish yoʻlga qoʻyilgani maʼlum qilindi.

Shuningdek, korxona tomonidan istiqbolda formalin asosidagi boshqa turdagi smolalar, xususan fenol-formalin smolalarini ishlab chiqarish ham rejalashtirilgan.

Uchrashularda tadbirkorlar tomonidan bildirilgan taklif va muammolar yuzasidan masʼullar tomonidan tegishli tavsiyalar berildi hamda ularni amalda hal etish boʻyicha manfaatdor tashkilotlar bilan hamkorlikda ish olib borilishi qayd etildi.
 

2025-yilda jahon qayta ishlangan isteʼmol plastmassa (PCR – Post-Consumer Recycled) bozori hajmi 13,2 mlrd AQSH dollariga yetdi. Grand View Research prognoziga koʻra, 2026–2033-yillar davomida bozor hajmi 14,8 mlrd dollardan 30 mlrd dollargacha oshadi.

Bu davrda oʻrtacha yillik oʻsish surʼati 10,6 foizni tashkil etadi.
 
Bozorning oʻsishi oziq-ovqat, ichimliklar va qadoqlash sanoatida faoliyat yuritayotgan kompaniyalar tomonidan barqaror rivojlanish tamoyillarining keng joriy etilishi hamda qayta ishlangan plastmassa materiallaridan foydalanish hajmining ortishi bilan izohlanadi.
 
Agentlik maʼlumotlariga koʻra, eng yirik bozor Osiyo–Tinch okeani mintaqasi boʻlib, umumiy daromadning 45,1 foizi aynan ushbu hudud hissasiga toʻgʻri keladi. Eng tez rivojlanayotgan bozor esa Shimoliy Amerika hisoblanadi.Material turlari boʻyicha polistirol segmenti eng yuqori oʻsish surʼatlarini namoyon etishi kutilmoqda. Mazkur segmentning yillik oʻsishi oʻrtacha 5 foizni tashkil etadi. PCR-plastik (Post-Consumer Recycled) — isteʼmolchilar tomonidan foydalanib boʻlingan chiqindilar (masalan, plastik butilkalar va qadoqlash materiallari)ni qayta ishlash orqali olinadigan ikkilamchi polimerdir. U yangi qadoqlash mahsulotlari hamda keng isteʼmol tovarlarini ishlab chiqarishda qoʻllaniladi.
 
PR tadqiqotiga koʻra, jahon biologik parchalanadigan plastmassalar bozori 2025-yilda 5,4 mlrd AQSH dollariga baholanmoqda. 2034-yilga borib ushbu koʻrsatkich 19,4 mlrd dollarga yetishi, bozor esa yiliga oʻrtacha 15,3 foiz surʼatda oʻsishi prognoz qilinmoqda.